特首梁振英高度重視，重視到要帶兩司六正副局長去睇粵港澳大灣區城市群，梁特噚日終於結束行程返港，此團特色之一係隨團官員中唔少表明唔會過渡去新班子，包括率先表態離開熱廚房嘅政制及內地事務局局長譚志源。唔知係咪諗起就快脫苦海，加上人在外地好鬼high，譚局此行不時selfie，仲要擺相喺微信同朋友開心些牙。
考察期間手舞足蹈
梁特重視呢次考察，從佢日前話此行「規模大、人數多、層次高、代表性廣泛」可見一斑！有份一齊遊大灣區嘅譚志源，似乎對離開打咗30年嘅政府工冇乜不捨之情，考察期間不時手舞足蹈，春風得意，譬如去睇港珠澳大橋，佢就拎出手機紮好馬自拍，自己影都唔夠喉，再捉埋行會成員鄭耀棠一齊留影，傳媒影佢相時仲會好風騷咁整鬼臉㖭呀。