候任特首林鄭月娥新班子仍然未齊腳，唔少人拒入由女大廚主理嘅「熱廚房」，現有班子願留任嘅亦唔多。八方早前報道過，現任律政司司長袁國強決定7.1後告別政府，準備重返Temple Chambers搵真銀。
建制幫物色律政司人選
據知近年健康麻麻嘅袁國強一早喺舊年未選出新特首時去意已決，而佢嘅好友近日都已經為佢準備好約1,000呎辦公室，等佢7月離任司長加過咗半年「冷河期」後重操故業。
而喺資深大律師鄭若驊盛傳拒絕林鄭邀請接替袁國強後，建制派不時協助林鄭物色新人選，日前就連律師會前會長王桂壎同私隱專員黃繼兒亦榜上有名。
八方聽聞，建制派早喺特首選舉前都不停幫林鄭搵人，有人曾詢問大律師公會前會長譚允芝及監警會前主席翟紹唐有冇意接任，據聞譚允芝最初表現決絕，後來卻口風放軟話「選完至算」。
據聞翟少對出任司長興趣唔大，原因同搵錢無關，而係佢一向好關心兩名愛女成長，「每隔一、兩個月，就要飛去倫敦睇對寶貝女」，做咗司長咁困身就好難成日去探女咯！