人類都是感情的動物，就算對北京唯命是從到加零一如特首梁振英，相信都有喜怒哀樂嘅！八方並唔係話信口雌黃，而係從特首辦回覆特別財委會、有關梁振英過去5年嘅公務酬酢開支而推論出嚟。
佔中減應酬追打港獨
話說梁振英上場嘅12/13年度，公務酬酢開支有成46萬多，當然有部份可能係上手煲呔曾搞farewell啦，但去到13/14年度都仲有成38萬多，咁又係，梁特苦候多年，終於登上特首寶座，開心到彈起之餘，梗係會搵唔同界別人士擦餐勁，收風兼威風。
但至14/15年則跌到近8萬5，點解？一方面梗係要賴佔中啦（呢點八方都係學建制派㗎咋），佔中令到梁特冇心情，另外梁特又要減少應酬專心工作，君不見2015年佢就發表針對港獨嘅《施政報告》！
到咗本應收成期嘅15/16年，梁特輕鬆番啲，事關當時佢都應該相信連任冇問題，所以一年係咁易用約18萬蚊！但剛結束嘅16/17年度就同政局一樣好複雜，截至今年2月底，梁特已經花咗27萬應酬，唔知當中有幾多場有人預祝佢連任成功，現實卻係舊年年尾佢突然收到大信封，卸任前隨時因為餞別又要使多一筆。