將於5月7號在沙田馬場舉行的主席短途獎（一級賽1200米），雖然外隊得一匹來自法國嘅「福兆」參戰，但唔代表呢場戲碼好差，首先係前短途王「友瑩格」告別之戰，仲有「紅衣醒神」、「幸運如意」、「幸福指數」等短途好手列陣，邊匹馬贏得今場，就好大機會問鼎最佳短途馬寶座。
練馬師姚本輝見同場賽駒實力咁勁，所以佢就力邀23歲澳洲年輕好手連達文，為馬房鎮倉寶綠魔「有得威」操刀，期望以這位騎師實力，發揮出綠魔潛在能力，從而贏得主席短途獎。
連達文喺澳洲可以話發展得十分順利，今季澳洲上名率接近45%，對比上季只得38%，可以話進步良多，更已獲得4個一級賽冠軍，且看綠魔喺連達文手上發揮成點！