【本報訊】是次入股有線的財團永升，原本由邱達昌家族牽頭，被問到為何突引入新世界大股東鄭家純，邱指兩人相識30年、多次合作，雖然鄭「同我（邱）冇兩句」，但一句「你話事」就放心交由邱處理，料鄭同意電視傳媒不會滅亡的理念，故同意合作。
「鄭胸襟大易合作」
記者會上邱達昌多次強調與鄭家純「冇兩句」，但合作生意項目多達二、三十個，「有啲生意佢話『你話事』，就交畀我去管……有啲生意係我哋交畀鄭生管，我哋真係冇兩句」。邱又稱讚鄭家純「胸襟好大，係好容易合作嘅人」，力邀對方入股時曾言「覺得電視傳媒唔會滅亡嘅，係會去演變」，相信鄭因同意理念而入股，更是新股東永升單一大股東（45.5%），而邱只持24.5%。
事實上，邱鄭兩家早於傳媒行業結緣。邱達昌之父邱德根於80年代將連年虧損的麗的電視，變身亞洲電視，開源節流成功扭虧。邱家及後引入鄭家純父親鄭裕彤、麗新林百欣，三家合營亞視，被譽為亞視最光輝日子。可惜亞視依然經營不善，終在去年4月正式「熄機」停止廣播。
邱鄭兩家於地產本業亦多次合作，如2015年合作競投西鐵元朗站物業項目，同年遠展、鄭家周大福企業合作中標澳洲布里斯本Queen's Wharf度假村。年初新世界亦與遠展合作競投港島黃竹坑站第一期物業發展項目。
■記者黃翹恩