「細威」莎蓮娜喺上年年底同Reddit嘅共同創辦人奧漢尼恩訂婚，而佢周三就喺snapchat大晒自己着住黃色泳衣、有少少凸肚嘅相兼寫住「20周」（右圖），向粉絲宣佈自己做媽媽嘅喜訊！
雖然呢位35歲嘅網球一姐之後刪走張相，但係佢嘅發言人Kelly證實細威確實係大咗肚，仲話預產期喺今年秋天，咁即係話細威喺今年一月澳網係「大住肚」咁捧盃！細威證實懷孕後，今季會提早收「咧」並計劃喺2018年復出。
