本港嘅導盲犬一向係來佬貨，但香港導盲犬服務中心打破傳統，令導盲犬終於出現本地薑！當中Happy同Holly就喺本地出生同訓練，現時已成功同視障人士配對，另外幼犬Bess同Bingo下月底亦會分別捐贈畀日本及台灣。
首批本地繁殖嘅導盲犬彌足珍貴，原來每隻繁殖同完成訓練共花費25萬元，中心唔會向視障人士收取費用。
李苑甄係首位喺香港受訓嘅國際認可導盲犬訓練員，Happy同Holly就係佢訓練出嚟㗎！
李形容4年嘅訓練令佢睇到港人對導盲犬嘅誤解同歧視，「我好記得最初帶導盲犬入商場時如臨大敵，有好多管理員拎住對講機跟住我，有人喺度講（導盲犬）𠵱家朝向百佳方向，百佳又有一個管理員同下一個講我𠵱家行到邊度」，不過近一兩年情況好咗嘞。