呢排嘅組班傳聞越傳越令人驚訝，好似律政司司長一職咁，唔知係咪因為袁國強唔肯留任、鄭若驊又拒入熱廚房，所以唔理邊一個，有少少機會掌舵嘅都唔放過？《信報》噚日報道律師會前會長王桂壎同現任私隱專員黃繼兒亦係疑似人選，八方打聽過，有建制派見林鄭似乎未搵到合適人選，拋出唔少名字試水溫，唔知呢啲係咪叫皇帝唔急太監急？
王桂壎回覆傳媒查詢時話呀，冇人就呢件事接觸過佢喎。查實王桂壎啱啱先獲梁班子委任做通訊事務管理局主席，政界普遍唔多信轉個頭林鄭就挖角邀請佢入熱廚房，而佢今年約66歲，未必啱林鄭年輕化嘅口胃。
至於曾喺律政司任副法律政策專員嘅黃繼兒，2015年起出任私隱專員，作風都算較開明，但今年亦62歲，唔知年齡係咪亦成阻礙？