一班退休老友坐埋講退休規劃，講到政府年金，意見就多咯，究竟買唔買得過？坦白講，香港人嘅財富有幾百種分佈模式，幾難有一致性，冇話一個年金計劃可以啱晒所有人嘅。譬如富豪級數人馬梗係對政府年金計劃不屑一顧，如十幾年前詹培忠請左丁山在上海會食蟹粉翅就呻過：「原來每個月要使晒啲股息都好難，何況久唔久又可以在拉斯維加斯贏到一兩百萬美金！」好似詹兄過着幸福退休生活的人，香港不在少數，至於另一極端，每個月靠生果金、綜援與生活津貼過日嘅，相信起碼有幾十萬，餘下來在中間，能有一百萬元買政府（金管局屬下之香港按揭政券公司）推出之年金嘅，怕起碼亦有數十萬人。
按揭證券公司計劃推出退休年金，每年由五萬元起，至一百萬止，65歲或以上人士每買一百萬元，每月男性可得派發最高5800元，女性最高得5300元，銀碼有差異，係因為香港女士平均壽命長，今年65歲女士預期可活至89.75歲，65歲男性預期可活至85.37歲，精算師計過嘅嘞，計到尾，男女壽命完結前之總所得應無大分別。
買一百萬，每年攞番6萬9千6嘅話，等於6.96厘回報，豈非好着數？非也，按揭公司計過，派發金額係連本帶利，並非純粹利息回報，男性如果真係收錢收足20年，共收回一百三十九萬元，算幾好賺㗎，何況呢類年金應該係近乎冇風險嘅啫！信唔信按揭證券公司會違約或破產關門？機會好微囉。
然則咪個個去買？咁又未必，定息回報年金之最大風險係高通脹、高利率，如香港80年代咁嘅通脹率，十幾年後，每月收到嘅5800元，根本冇乜購買力。但所有退休人士如買定息債券都會面對相同風險，買股票就可以對抗通脹，但十幾年前匯控過百元一股，現在匯控股價六十零蚊，股息低於4元，長期股東咪又係悶悶不樂！買樓收租又如何？除非退休人士早有物業啫，今日揸住一百萬元，有乜資格買樓收租呀？根本冇得諗，何況收租會可能遇上租霸，要花錢維修，65歲以上長者幾難有精神去打理租務事宜，買Reits收息又如何，係一條好計，但Reits市價亦會隨股市浮動，長者要識得管理風險。買按揭證券公司嘅年金睇落幾唔錯，如有幾百萬元退休金在身，用一百萬買按揭公司年金，值得諗諗。
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw