事隔八年，樂壇鬼才林敏驄再次開個人作品展演唱會！由於訪問林敏驄係一件好艱難嘅事，十條問題有十二條都唔會得到正常答案，於是今次佢就破天荒化身十二道驄味廚神，磨刀揈蕉食雞蛋仔之餘，仲自己訪問埋自己，真係令人大開眼界！
廚神：我聽邊個邊個講，話你開作品展演唱會，係咪樂壇要你打救一下呢？
驄：有錢搵咪開囉，你儍儍哋，冇糧出你做不做呀？
廚神：咁你籌備成點呀？
驄：個show邊使我搞，大把人搞啦，個個都識行識走，嚟到識唱歌，啲歌本身好聽嘛！ 我去收銀咋嘛，唔使收銀咩？放低錢好走啦！
廚神：咁多人話你係鬼才，其實一個鬼才係點煶煉出嚟？
驄：首先要搵兩個鬼妹同埋鬼仔，撈埋一齊，就撈出一個鬼才！我阿爸應該都搞了幾多鬼妹，哈哈
廚神：咁你呢個鬼才最欣賞邊個？
驄：李清照、李太白、李太黑同埋李太公，李太白嗰首膝頭歌好好聽
廚神：其實你講嘢咁快，人哋都捉摸唔到你，係咪你個口快過個腦呀？
驄：呢個學名叫做Speech thinking，係口快過腦，有時未諗好都已經講完啦
廚神：你唔驚講錯得罪人咩？
驄：由佢錯啦，有時候錯有錯著嘅
廚神： 話時話，你年紀都唔細，退休後想做咩呢？
驄：環遊世界啦，駕船出海咁！其實我係外星人嚟，人類計我其實依家只係廿幾歲
採訪：小米、余傲芝
攝錄：馮峰、Neo
攝影：仇志德
場地提供：鮮入圍煮
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw