分手要點做？歌仔都有得你唱「分手要狠，比相戀勇敢」，華潤集團就係好例子！事關華潤旗下潤地（1109）日前公佈，做足20年獨立非執董嘅萬科（2202，深︰000002）主席王石要退任，徹徹底底say goodbye！
雙方恩怨情仇說來話長，但近兩年萬科嘅股權爭奪戰中，一直搞唔掂寶能等對手，惟有搵外援深圳地鐵幫手買資產換股，以圖攤薄對手。
點知原來萬科當時冇向入股17年、一直友好嘅華潤講聲，激到掌舵人傅育寧嬲嬲豬，仲傳出王石多次求見傅育寧被拒，傅育寧只肯見萬科總裁郁亮云云。
華潤最終於今年1月向深鐵悉售手上萬科股權，怒斬17年情。早排兩會開會，傅育寧又講明，同萬科「這一頁已經翻過去了」，冇關係了。咁家陣王石唔做潤地獨地都好啱數嘅。