人稱公民廣場嘅政府總部東翼前地，加裝永久鐵欄都超過兩年半，成座監獄咁款，八方有時經過不禁納悶，喺入面返工嘅人覺唔覺得自己好似囚犯咁呢？而自從林鄭當選下任特首後，政圈無論左中右都有人要求重開公民廣場，認真心有靈犀嘞。
除咗自由黨黨魁鍾國斌同公民黨郭榮鏗近日接受傳媒訪問，力促林鄭開番公民廣場，八方聽聞連民建聯劉國勳都低調跟進，話說佢喺特首選舉期間已去信政務司司長張建宗要求重開，但張建宗至選完特首後先回覆話唔得。
劉國勳同八方證實曾經去信促重開，認為若作為特殊措施要封咗廣場，都係時候重開，唔能夠斬腳趾避沙蟲。至於佢幾時去信張建宗呢？原來係3月3日，咁啱同日《蘋果》刊登嘅報道，林鄭喺訪問中稱考慮重開公民廣場，唔通劉國勳受林鄭啟發？