一代賊王過身，難免令人想起香港電影金像獎最佳電影《樹大招風》，基本上小弟都覺得佢係上年最佳港產片之一，黑仔、家棟、小齊等都好出色，不過對結局就唔多滿意，始終成套戲講得最多嘅「三大賊王破天荒攜手合作」都冇出現，劇本太忠於現實，三大賊王一如現實生活中嘅結果，但電影係一個夢工場，就係要畀觀眾睇現實以外嘅嘢㗎嘛。
正如上季英超，李斯特城灰姑娘式封王，呢啲結局咪夠震撼囉，今季英超又會唔會上演龜兔賽跑呢個寓言呢？事關車路士一早放離成條街，又冇歐洲賽包袱，應該好穩陣，不過季尾失吓又三分，失吓又三分，只領先熱刺四分咋。雖然車仔餘下賽程都好弱，不過主場對水晶宮都輸得，又有邊個可以擔保餘下六仗拎到五勝？相反熱刺就真係龜仔本色，連贏七場聯賽，對住阿仙奴同曼聯都冇有怕。
身為阿仙奴球迷，都真係要佩服今季嘅熱刺，特別係領隊普捷天奴。之前有傳巴塞隆拿想搵佢做新教練，不過普帥踢過又教過巴塞同市死敵愛斯賓奴，公開拒絕，仲話一世都唔會教巴塞，真係型到震。唔單止講嘢夠膽，佢用人都夠膽，小將迪利阿里（左）、艾歷迪亞等已成為球星，孫興民𠵱家踢番擅長嘅左輔鋒亦如魚得水。周六對車路士嘅英足盃四強，雖然同英超冠軍爭霸冇關係，不過如果熱刺喺呢場大戰再贏車仔，就可以打擊對手信心，跌埋個英超冠軍都唔奇，呢個結局夠晒綽頭未？
文：牽牛