特首梁振英噚日率團到廣東省6個城市考察粵港澳大灣區規劃，唔少問責高官隨行，包括政務司司長張建宗、財政司司長陳茂波，策發會等成員亦獲邀隨團，浩浩蕩蕩成30幾人出發。
唔知係咪擔心大灣區無啖好食，定係朝早7點幾要上船驚住肚餓？唔少訪問團成員上船前急急喺附近餐廳醫肚，當中以運房局副局長邱誠武食得最盡興，佢先同「梁粉」團友李秀恒坐低開餐，跟住又同攞住件餅嘅民建聯陳恒鑌吹水，確保食到飽先上船。
而代表團噚日朝早抵達南沙後，先參觀南沙自貿區規劃館，然後轉到廣州出席粵港澳大灣區座談會，梁特提及香港重視大灣區城市群嘅規劃，要做到「錯位發展」，就要香港同廣東各城市優勢互補，舉例指：「廣東的主題公園與香港的主題公園主題不一樣，這個就是錯位發展。」