現年51歲嘅郭富城，前日喺尖沙嘴半島酒店迎娶29歲內地模特兒方媛（Moka），加上佢已有身孕可謂雙喜臨門。前晚城城嘅婚宴酒席一啲都唔失禮，有燕窩、花膠同鮑魚呢類名貴菜式，但冇魚翅，都算環保。一對新人送完賓客之後，大約凌晨兩點工作人員搬大量行李同禮物，送上泊喺後門嘅七人車，之後一對新人上車，返回大坑寓所。噚日佢哋就留喺屋企休息，城城為咗應媽咪「開枝散葉」嘅要求，會加倍照顧好老婆。
Sunny冇出賣老友
一對新人暫時未去度蜜月，城城會暫時休息一陣，下個月就拍新戲，而Moka粗身大細，又未拎到居留權，所以要中、港兩邊走，城城知媽咪好期待粒孫出世，為咗方便照顧大肚Moka安胎，將會申請Moka來港定居，有傳已plan好喺香港生B。
城城好友Sunny Wong同胡琳噚日喺觀塘出席一樓盤活動，講到前晚城城婚宴，Sunny話：「好開心好感動，見到阿王（城城）踏入人生另一個階段。」但唔肯講婚禮詳情。對於前日有接新娘片段流出，佢就話唔關自己事。網上又流傳話城城外父喺婚禮上同城城講自細聽佢嘅歌，問Sunny有冇聽到？佢話：「我忙住做兄弟冇聽到。」問到城城雙喜臨門，Sunny話：「咁快？我冇問喎！」至於城城會唔會度蜜月或返內地再擺酒？Sunny一概話唔知。
撰文：馮仁昭
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw