家吓間間公司都要大力發展網上媒體，同市民connect，天文台都一樣。天文台喺復活節假期完結復工第一日，即時刊登空缺請人，以月薪37,570元招聘社交媒體主任，係咪攞3萬幾蚊人工印印腳玩facebook咁筍？八方相信都係「NO NO NO」。
兼顧設計同製作
睇番個招聘廣告，呢名社交媒體主任任務多多，除咗要負責設計、發展同埋管理天文台facebook同Instagram，亦要設計、製作、發佈社交媒體內容，兼且要諗埋文字、訊息圖、影片、動畫、劇本等等，真係一身兼三職，好鬼忙咁噃。
天文台同時招聘另一份工，同樣以月薪37,570元招聘研究主任；研究乜嘢呢？原來又係社交媒體噃！天文台要求應徵者曾經喺大型機構負責多媒體、網站出版及市場推廣，仲要有負責發展同管理社交媒體平台，兼且有利用社交媒體、數碼程式從事市場推廣，推動公眾參與嘅工作經驗，應徵者仲要識用好多種媒體工具。
由招聘呢兩份工，可見天文台都敵不過呃like旋風，針對社交媒體去強攻。若果自命有能力幫天文台喺社交媒體突圍而出，不妨應徵，兩份工同樣喺下月2日截止申請。
李八方