特首選舉期間不時炮轟林鄭月娥處事官僚嘅新民黨主席葉劉淑儀，似乎已經不計前嫌，噚日朝早同佢口中嘅妹妹、𠵱家貴為候任特首嘅林鄭會面，其後仲將兩人合照擺上facebook呃like㖭！
姐妹重逢冇理由兩手揈揈，葉劉帶咗見面禮，就係由佢創辦嘅匯賢智庫早前發表嘅《香港長遠競爭力研究報告》，期望報告對林鄭施政有幫助，呢份「厚禮」，林鄭點敢唔珍而重之？葉劉喺fb留言：「林太表示會仔細閱讀。期望這報告能對她未來的施政有所裨益。」
葉劉其後現身立法會，被問到同林鄭傾咗幾耐同傾咗乜嘢時，佢只係重申向對方交咗一份報告，「我哋私人會談，唔方便講」；問到係咪林鄭約見佢時，佢亦只係好玄咁話：「我哋大家約啦！」刻意保持兩姐妹傾私密嘢嘅神秘感。