八方早前都寫過，候任特首林鄭月娥喺北京領取委任狀後，政圈突然傳出現年58歲嘅前入境處處長陳國基（圖）獲邀加入新班子，當時有傳佢會做保安局局長，延續保安局由入境處高層揸fit嘅傳統。但近日忽然傳出陳國基查實另有重任，有傳媒引述消息指佢極大機會擔任特首辦主任做大內總管，佢回應傳媒查詢時只稱唔評論，空穴來風，未必無因喎。
一度盛傳係大內總管熱選嘅食物及衞生局常任秘書長聶德權，據知仍然係林鄭閣員人選，但至今尚未定佢嘅落腳位。
至於現任特首辦主任邱騰華，有傳媒話佢有希望更上一層樓，可能會擔任政務司司長，而現任政務司司長張建宗就可能降呢掌教育局。