費清平時食西餐，間唔中都會order法式田螺過吓口癮。早排去採訪巴西凍肉出事單新聞，喺凍肉舖見到有田螺肉賣，望吓價錢，一罐6安士螺肉只係賣68蚊，平到咁其實都唔算意外，但係發現田螺殼同肉原來係分開嚟賣，而且最神奇嘅係，50個殼要成138蚊咁貴。點解啲殼仲值錢過啲肉？
法國菜主廚Steve伍永德同費清講，正宗高級法國大餐一定係原隻田螺買返嚟，再挑走內臟去煮，但香港地講快講效率，好多餐廳而家都會分開肉還肉殼還殼咁買，先煮完啲肉，再釀返落個殼度上碟，客人食完就收返啲殼循環再用，用到爛先至揼，所以啲殼係有價有市。
查實呢環保係值得鼓勵嘅，但上一手食完下一手再用，咁咪好唔衛生？Steve話餐廳通常都會洗乾淨啲田螺殼，好似佢咁就會叫洗碗姐姐用「手指刷」刷乾淨先，再放入180℃焗爐焗一焗佢，做到殺菌消毒。不過佢都承認，有時有啲汁液會流到殼入面未必洗到，冇乜必要就唔好吮個殼。（咦．．．）
Steve話罐頭田螺比較韌同帶有泥味，要先炆返個零鐘煮到冧先，自己就鍾意加埋雞湯、白酒去煮，之後可以選擇加牛油焗一焗佢，或者配上香草汁、茄汁咁食。而一般罐頭田螺食落會比原隻田螺軟身。
聽完專業人士咁講，費清即時反應係「唔係呀化」，原來自己喺唔知情嘅情況下，同過無數咁多個人間接Kiss，真係諗起都起晒雞皮，絕對可以同菠蘿炒飯個菠蘿殼、龍蝦伊麵個龍蝦殼加埋一齊合稱「環保三兄弟」。