蘇偉賢馬房「八心之煌」今朝由見習騎師黃皓楠首次過檔，以了解馬性，此駒在內圈踱步作最後備戰，晨操專家積奇指「八心之煌」收身上力毛色靚，雙目有神生猛活潑，狀態已在最佳水平。
「八心之煌」將跑周四(20日)快活谷夜馬第四場四班1000米，由黃皓楠執韁排4檔好位上陣。「八心之煌」以往由大摩訓練，今季轉投蘇偉賢，雖然拉倉後跑過多仗仍未勝，但近五戰得一亞兩季一第五，演出其實十分穩定。
由於騎開「八心之煌」的雷神莫雷拉，今場揀騎「美麗之友」，因此「八心之煌」才易配皓楠仔，但「八心之煌」絕非一定機會較低，此駒身形並不龐大，但一連9仗負130磅以上，其實甚吃力。
今次「八心之煌」用皓楠仔一下子減至122磅，不但如釋重擔，而且有項驚人數據大家要留意，原來此駒曾8次負122磅或以下出賽，得1冠4亞3第五例有獎金，入Ｑ率達半，可見牠的確輕磅特佳。