【賊王病逝】
【本報訊】一代「賊王」葉繼歡昨離世。自他入獄後，翁靜晶一直為對方奔走，二人相識始於翁的著作《危險人物》。其後翁負起照顧葉女兒的責任，葉每逢節日都會送上自畫感謝卡，更為翁的著作寫序。葉的遺願除了一家團聚，更希望為囚友爭取看中醫。翁靜晶又稱，葉繼歡對所犯的錯感後悔，「最後悔係個女成長佢見唔到」。
記者：周鳳儀
翁靜晶當年為作品《危險人物》作資料搜集，到獄中跟葉繼歡見面，兩人自此相交，直到一代賊王離開。翁昨接受本報訪問，自言是從報道中得悉葉離世，她說葉的妻女得悉噩耗後感傷心，「佢哋當然好難過，不過都冇辦法，因為佢身體又咁差，同埋都咁多年，我未知佢哋會打算點處理，因為懲教署都未正式接觸佢太太同女囉。」
她透露葉家經濟並無問題，女兒亦已中學畢業。其實10多年前劉鑾雄透過其慈善基金向葉的妻女發放資助金，而葉的女兒就由翁靜晶一手一腳湊大：「佢個女係我湊大嘅，帶咗佢個女同我大女一齊讀書，喺外國長時間都同我一齊住，𠵱家已經事過境遷。」葉的太太亦完成室內設計課程，目前亦學有所成，做一些小生意，所以生活不成問題。
依照女兒樣貌畫賀年卡
翁跟賊王相交多年，每逢節日葉都會送上畫作祝賀，其中一張為2004年以少女為題材的賀年卡，昨日被網民在facebook上載，卡上寫着：「翁小姐，送上我親自畫的賀年卡一張，並且多謝您一直以來的幫忙，在此祝您和您的家人新年快樂，身體健康，萬事如意。」不少網民嘖嘖稱奇，想不到一代賊王會畫畫。
翁靜晶笑言該張賀年卡的漫畫少女，其實是依照葉繼歡女兒樣貌繪畫，寓意是希望翁靜晶能夠好好看顧她，又說：「佢成日畫畀我㗎，佢畫嘅都唔止呢個題材，佢乜嘢都畫，我唔知佢畫少女漫畫，我諗係佢個女嘅反映嚟㗎，因為佢個女係咁上下樣，真係好似。」
原來扣減假期，葉繼歡預計最快明年或後年就可以出獄。翁靜晶透露葉繼歡最大的遺願除跟妻女團圓外，最想替囚友爭取可以看中醫，緣於葉繼歡與警方駁火期間中槍，下半身從此失去知覺，翁靜晶說：「當時中槍觸到神經線，令佢下半身冇感覺，但好奇怪佢個痛症係持續冇停過，後來醫生check到呢個病叫『魅影痛楚』，好大件事，係冇得解決，只可以打嗎啡，但最後已經打到要死嘅劑量啦。」
高永文出手助葉看中醫
葉繼歡曾經提出中醫治療，但要經過懲教署不少關卡。翁靜晶說：「首先第一關要過，就係專家證明中醫點解好過西醫，最後我哋千辛萬苦搵到呢個人。搵到之後又要過第二關，就係要搵一個具備有中醫同西醫資格嘅醫生，結果高永文醫生肯出手，佢仲話為咗葉繼歡，可以一年內唔出門，24小時stand by。」翁慨嘆遭懲教署留難，直到葉離世都未能成事。
翁靜晶認為葉提出的原因，並非單純為了自身利益，而是為囚友爭取基本人權：「我想講雖然佢係一個械劫犯，但冇殺過人，雖然佢係犯咗重罪，但其實佢都服咗刑，承受咗個結果，喺入面都會反省同後悔，想再做啲有貢獻嘅嘢出嚟。」 翁靜晶又稱：「佢深知自己犯錯，非常非常後悔，如果畀佢重新嚟過，一定唔會咁做。最後悔係個女成長佢見唔到，最想出返嚟喺教會服務，可惜做唔到。」
手機用戶請按此觀看Timeline:
【葉繼歡成魔之路】 http://bit.ly/2pBW4ra