嚟緊呢輪英超冇大波，因為全部去晒踢英足盃四強，其中車路士周六硬撼熱刺，喺英足盃上演英超榜首大戰。車路士今季表現平穩，好大程度在於傷兵唔多，一旦個別主力受傷，實力即刻打折扣。
數車路士人手最薄弱嘅位置，小弟覺得係兩邊翼衞，家陣得三個球員踢到，分別係右翼衞域陀摩西斯、左翼衞馬高斯阿朗素同埋中後場通天佬倌艾斯派古達（AZP、左），其中AZP今季嘅正職係中堅。前排摩西斯受傷，干地諗住搵柏度洛迪古斯試打右翼衞，點知完全唔掂，結果嗰場就輸咗畀水晶宮。之後干地就放棄搵柏度打翼衞，改為郁晒成條防線，用AZP踢右翼衞，葛特蘇馬就踢中堅。上場對曼聯，就輪到阿朗素傷，AZP兼任左翼衞，結果呢場都係輸。
AZP踢法偏守，加埋係右腳球員，如果搵佢踢左閘，佢可以好穩陣，但翼衞就唔同，需要好強嘅進攻意識。無論係點，AZP已經係車路士最好同唯一嘅翼衞替補。今季車路士單線作戰，三個人踢兩個位都仲頂得住，但下季有歐聯踢，賽程多咗就需要球員輪換，一個AZP做替補實唔夠用，車仔今夏肯定要買人。
最後講一講呢場英足盃四強，要睇吓干地識唔識變，因為摩連奴上場教曉全世界點樣對付車路士。普捷天奴嘅熱刺年輕有活力，中場效率仲高過曼聯，如果普帥用番摩佬嘅戰術而干地又唔變的話，車仔恐怕輸得更慘。
文：咖喱