久未露面嘅「監管天王」狄勤思（Mark Dickens）噚日現身，為金融發展局新報告解畫，會後華華梗係要八吓佢對密鑼緊鼓嘅監管改革有乜意見喇。點知問極佢老哥都話No comment，No comment，咁小心，點解？
事關Mark做過聯交所、證監會，噚日喺立法會新鮮滾熱辣嘈緊嘅上市架構改革，佢怕講多錯多，得罪邊一方都唔掂。
咁佢退休前最後一份工係財務匯報局行政總裁，由任內至今，上市公司核數師監管改革都仲未推到上立法會，Mark哥又有冇冤屈氣想呻？
問到呢瓣，佢更加耍手擰頭，怕現任財匯局主席潘祖明、行政總裁衛皓民（Paul Winkelmann）唔鍾意喎。
兩位都係大人物，心胸廣闊，會唔會係Mark過慮呀？佢微微一笑指「舊人意見唔會受歡迎㗎」。估唔到佢深明中國人嗰句「不在其位，不謀其政」，認真知情識趣。
狄勤思來自澳洲證監會，早於1991年嚟香港證監會做過企業融資部、法規執行部、市場監察部，正當個個都以為佢升硬CEO時，過檔去惠理（806）做風險總監，2009年重返監管機構，做港交所上市科阿頭，宣佈退休後馬上獲政府委任做財匯局CEO，做足3年先真正退休，得閒做吓研究咁。