數鄧兆尊嘅出名史，除咗知道佢係已故慈善伶王新馬師曾鄧永祥個大仔，佢仲有個（可能係）勁過佢伯爺個朵嘅朵——「現代韋小寶」。兆尊有3名紅顏知己Carmen、車厘子與及Claire喺身邊相伴，從一變二，再由二變三，多年來相安無事，相信兆尊嘅御女術，係好多男人眼中嘅典範。
喺今年2月，兆尊接受《蘋果》獨家專訪時提及3位女伴嘅相處之道，話喺自己眼中3女冇分大細，人人平等，佢更爆3女私底下有個通訊群組，自動波會夾好邊個做主打：「佢哋大約知道今日會陪邊個，知有個主打，主打覺得冇問題，咪一齊食飯。」佢仲話有時會交番畀3位女伴自己「拆掂佢」：「有時傾吓偈都會問，再等佢哋三個自己傾，始終大家有自己工作同朋友，喺佢哋心目中，大家係朋友。」
兆尊話自己冇乜節日觀念，對佢嚟講，最注重嘅係清明同七月十四：「開心日日都係節日，佢哋都認同。」多年來多於一個女伴，兆尊話自己冇試過分手：「互相包容啫，我好慶幸自己冇乜私隱，乜都可以攤出嚟講，當冇嘢去隱瞞，講句說話都可以自然啲，聽落都會舒服啲，我個人言出必行。」
對於外界封佢係現代韋小寶，兆尊淡淡然咁話：「金庸冇寫韋小寶有幾煩，你睇吓周星馳嗰套《唐伯虎》，咪話到俾你聽有乜嘢情況出現。（中略）屋企人一定有磨擦，呢啲係小問題，唔好將啲嘢放大就冇問題，乜嘢嘢都係講道理。」
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw