要走的終須走！近兩季一直傳話會告別車路士嘅隊長泰利，周一終於發表聲明，季尾後會離開，結束佢喺母會效力22年嘅生涯。事實上，呢位36歲中堅今季喺干地麾下長期冇正選，大家應一早料到呢個結局，唔算震驚，只係當年由摩連奴打造嘅車仔黃金一代，將正式結束；早前宣佈掛靴嘅前隊友兼好友林柏特，就喺ig寫咗篇感人肺腑嘅長文，向泰利致敬。
球迷家下最關注係泰利落「車」後會去邊度，因為佢講到明仲想繼續踢波，據英國媒體指，多達10幾間球會有興趣邀請泰利，英超就有西布朗、般尼茅夫同史篤城，其中西布朗一月嗰陣就曾向佢招手，媒體亦分析泰利可能會選擇留喺英超多過出外，尤其美職聯球會似乎冇乜邊隊對佢有興趣。咁中超呢？相信泰利都會考慮，皆因好多前車仔隊友同主帥目前都喺強國發展，只要有班主肯畀錢，唔愁人生路不熟。