星級分析員陸東有新動向，佢之前賣咗陸東資產管理，新近加入有內地背景、舊年改名嘅投融長富（850）擔任首席投資總監（CIO），兼任旗下一間叫中港通資產管理做負責人員（RO），染紅咁話。
投融長富前身叫中亞能源，現時大股東李振軍嘅背景都幾「多元化」，佢1999至2005年喺「中國司法」擔任記者，現為杭州投融長富金融創辦人兼董事長，從事證券、保險代理、貸款；佢2005年又成立咗間浙江電通資訊，從事文藝、廣告業務。家陣殺入香港股壇，搵來陸東幫手。
現年52歲嘅陸東做首席投資總監，都係做佢最專嗰瓣。值得留意嘅係，中港通資產管理之前叫做金石亞洲資本，其中一位董事係年僅25歲嘅尹希陽，佢之前喺陸東資產管理公司做過投資組合經理，今年初跳槽過去。
聽講，陸東仍然留喺陸東資產管理。其實佢近期都開始高調，例如上月滄海控股（2017）嘅投資者推介會見到佢出現。