經常喺維港附近出沒、接載旅客嘅「張保仔號」，佢嘅姐妹船「大張保」（Aqualuna II）噚日「出世」喇！呢架船全長98呎，全隻都用木造，由年屆86歲嘅香港老船匠區渭同兒子區世傑以兩年時間製造。區世傑話，隻船係爸爸退休前嘅最後作品，船底以全人手搭建，坐上去同一般用纖維造嘅船唔同，既舒服又通風。
區世傑同八方講，大張保用嘅木主要係抄木同柚木，因抄木結構硬，用嚟造船內部嘅支架；柚木具光亮感，用嚟搭建船隻外觀。佢仲話10年前整張保仔號嗰陣，全船都喺香港造，點知𠵱家香港已經冇辦法搵到整木船嘅人手同材料，被迫成個工序搬番大陸，嘆香港政府唔支持，係造船業式微嘅原因之一。
大張保周六開始營業，除咗載客遊維港，仲會去赤柱、南丫島等地，船上有酒水同小食提供，市民可致電2116 8821查詢。