現年29歲嘅無綫新聞小花駱文捷（April）今年初報道一單國際新聞時，唔小心將墨西哥城市瓜達拉哈拉講成疑似粗口「哥凸啦X拉」，仲直播埋出街。不過April樣靚聲甜，件事好快就平息。
原來前日仲係April嘅大喜日子，佢同任職警務人員、姓鄧嘅總督察拉埋天窗，恭喜恭喜！一對新人下午喺小教堂行禮，晚上再於尖沙咀喜來登酒店舉行婚宴，一班無綫新聞部同事都有到賀，包括新聞部高層袁志偉、主播黃麗幗、陳嘉倩、羅鈺文及前無綫主播姚雋彥等，各人都喺社交網上分享喜悅，見佢哋影大合照時都笑容燦爛，非常熱鬧。
駱文捷嘅老公喺行禮同婚宴上都穿上整齊制服，反而新娘子April愛美，當然要換多幾套靚裙。見April喺教堂內穿上一條low cut婚紗，配以簡單珠鏈，高貴清雅。晚上又換上一條較隆重嘅拖尾長婚紗裙，配以小皇冠頭飾，好有公主feel，宴會上亦有播出一對新人嘅甜蜜拍拖回憶，仲有去年求婚片段，旁白寫住﹕「你令到鄧總督察深深愛上你，無法自拔。」而April就感動到掩嘴。
之後April再換上紅色晚裝裙，並大晒冷，除了頸上大「抽」金鏈，同埋六對重量十足嘅龍鳳鈪。而主播都紛紛送上祝福。
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw