唔好以為人老就死咕咕，唔識變通，好似阿仙奴領隊雲格咁，真係活到老，學到老。喺禮拜一對米杜士堡場英超，雲格突然放棄沿用多年嘅四後衞，執教阿仙奴20年以嚟第一次排出3-4-3陣式，最後以2:1贏咗米堡。連雲格都求變用三中堅，睇嚟呢個陣式會係嚟緊嘅戰術潮流。
奧斯爾奠勝終止作客四連敗
近年越嚟越多勁旅試用三中堅，最先係祖雲達斯，之後到巴塞隆拿，今季車路士轉用三中堅後亦順風順水，熱刺季中都鍾意咗呢個陣，最近曼聯就係全靠變陣3-4-3，喺禮拜日贏咗車仔。見到大家都用得咁開心，雲爺爺喺禮拜一決定試新嘢，派出3-4-3陣式鬥米堡。雲格當然唔認跟風啦，「我覺得後防呢排唔穩陣，想加強防守。我哋最近成日面對一啲風格簡單直接嘅對手，我認為呢場都會係咁。」佢用哥斯尼做「清道伕」，負責包位，而洛賀丁同埋基比爾包列斯達就係左右中堅。阿歷士張伯倫就嘗試擔任右翼衞，另一邊嘅就係蒙利爾。
阿仙奴喺上半場守得幾好，米堡都冇乜機會，兵工廠仲喺42分鐘靠阿歷斯山齊士精采嘅罰球先開紀錄。雲格話：「我覺得新陣喺上半場發揮得好好，我哋冇乜畀到機會對手埋門，死球又守得好穩。到下半場，對手先至有一兩個黃金機會。」喺50分鐘，達寧右路傳中，尼格度為米堡追平1:1。61分鐘，米堡藉死球攻勢，丹尼爾艾耶拉近距離衝頂，被施治反應快撲出。71分鐘，山神斬波入禁區，艾朗藍斯用心口助攻，傳畀奧斯爾一射破網，幫阿仙奴鎖定作客贏2:1，終止英超作客四連敗嘅頹勢。
「我呢個年紀都可以改變」
67歲嘅雲格變陣贏波，佢賽後牙擦擦咁話：「我20年嚟第一次用（三中堅），證明就算到我呢個年紀，都可以改變。有時隊波冇乜信心嗰陣，加啲新元素，可以幫到隊波更集中應戰。當我見到對西布朗同水晶宮都失三球，我就知需要變一變。」除咗雲格外，三中堅陣對好多兵工廠球員都好陌生，好似哥斯尼話：「例如張伯倫，我哋好多人係第一次踢3-4-3，幾難踢㗎，但我哋都係有經驗同埋聰明嘅球員。」阿仙奴贏波後以57分排第六位，落後第四位嘅曼城七分，但踢少一場。兵工廠嚟緊會轉戰英足盃，下周日喺四強主場大戰曼城。