海洋公園又報喜，多咗位港產新成員！園方噚日宣佈，首隻在港出生嘅川金絲猴順利喺園內誕生，父母係來自成都動物園嘅雄性川金絲猴「其其」同雌性川金絲猴「樂樂」。由於家有喜事，所以園方噚日全面關閉「香港賽馬會四川奇珍館」，話要視乎川金絲猴母子情況，於其後兩三日開放部份展館，希望期間畀川金絲猴增進母子感情。
關奇珍館讓母子相處
原來海洋公園今次係首度參與呢個物種嘅繁殖，形容樂樂雖初為母親，但餵哺寶寶表現非常好，而川金絲猴寶寶亦已經學識飲奶，認真叻叻B。
川金絲猴喺國際自然保護聯盟瀕危物種紅色名錄上，被列為瀕危物種，現存僅約15,000隻。四川成都動物園副園長余建秋就話，其其同樂樂加入海洋公園後，團隊致力進行川金絲猴繁殖，呢次川金絲猴寶寶誕生，認真令人鼓舞。