身為「45歲關注組」核心成員、公民黨立法會議員陳淑莊（Tanya）幾時嫁得出，一直好受關注；前日佢身穿貼身露臂白色花裙現身教堂，仲獲一名打煲呔「男子」疑似跪低送花，莫非呢個黃金盛女，秘密封盤？八方問過Tanya，佢證實前日去咗跑馬地教堂出席婚禮，獲「一男子」送花冧爆，但事實係自己仍然雲英未嫁，皆因同呢位有心人，年紀上有太大落差，但當日人生中首次搶到花球，唔知係咪意味即將嫁得出？
查實今時今日，姊弟戀或者母子戀都冇問題吖，但如果大家知道呢個男主角，係位兩歲幾嘅細路仔，就知係一場美麗嘅誤會。Tanya笑指由於小朋友年紀仲細，加上相片角度，所以有呢張「跪喺度」向佢送花嘅搞笑構圖，透露當時係佢主動問小朋友：「可唔可以送花畀我呀？」小朋友就好順攤咁即時送花畀佢呢位Auntie Tanya。
「開心到好似執金」
而查實現實更爆係，新娘子拋花球前，講明現場女賓客中，只有佢合乎資格攞花球，所以花球一拋出後，冇人敢同佢搶，令佢喺人生中第一次搶到花球，「開心到好似執到金咁」。
問到喺花球「加持」下，係咪即將有好消息公佈？Tanya笑稱暫時未有住，但就好玄咁話呢啲嘢，「要攤開嚟做」，仲話會將個花球放喺自己議員辦事處，「以便時時提醒自己，一日冇普選，我都冇婚結！」
李八方