大逆轉！香港桌球「一哥」傅家俊（Marco）周一喺英國設菲爾德舉行嘅世界桌球錦標賽首圈雖然喺首節比賽以局數2:7大落後，不過喺第二節表現神勇，最終以以10:9淘汰22歲比利時新星比素（Luca Brecel），殺入16強。
「冇諗過反勝似發夢」
首節比賽完成後以局數2:7落後嘅傅家俊，喺第二節嘅前七局比賽贏出其中六局，追成8:8平手。其後比素以99:17勝出第17局，再度超前成9:8。不過，世界排名第八嘅Marco並冇因此而自亂陣腳，佢保持冷靜，接住一局打出一cue85度，以85:13贏出再追平9:9後，喺決定性嘅最後一局再有一cue56度並以104:1勝出，最終以10:9險勝首度參加世錦賽嘅比素晉級。
丁俊暉枱上「打丁」留名
賽後連Marco自己都話冇諗過可以「反吸」比素：「我實在冇諗過可以反勝，雖然喺比賽期間我一直叫自己冷靜，逐球逐球嚟，不過可以咁樣晉級，實在難以置信。」之後，Marco亦喺自己嘅個人社交網頁twitter度簡短咁寫住「Am l dreaming?...（我係唔係發緊夢？）」睇嚟今次咁樣贏波，佢真係好興奮。
Marco就喺世錦賽以神奇反勝留名，而中國嘅丁俊暉就以另一種方式留名。佢喺首圈同19歲小將周躍龍上演「中國打吡」中，首節就盡顯「大哥」風範，第四局打出一cue136度，並且喺呢場19局10勝制賽事先聲奪人，首節領先7:2。唔只轟出高度數，小丁喺第五局領先25:8期間，電視畫面咁啱影到啲紅波好似打咗個「丁」字出嚟，呢種留名方式就叫做霸氣囉！而丁俊暉喺賽後亦於微博晒出咗呢幅電視圖片，仲寫住：大丁！（now637台今日5:00pm直播）