飛達帽業（1100）老闆娘顏寶鈴出名做事親力親為，勤力之外，佢仲好錫家人，之前成日同傳媒開口埋口講起兩個仔，講咗咁耐，噚日終於帶二公子顏肇翰（Alex）出嚟見大家，估唔到佢加入飛達唔夠3年，對公司業務瞭如指掌，應付傳媒提問完全no problem！
Alex未到30歲，package唔差㗎，佢喺美國印第安納州西拉法葉市普渡大學畢業，主修經濟，返香港後加入一間投行，2014年加入飛達，做咗一年就升呢做執董，未婚，仲係筍盤。
Alex目前主要負責美國業務，當中附屬公司San Diego Hat Company（SDHC）係由佢打骰，舊年呢個專做女裝品牌嘅SDHC由虧轉盈，難怪顏太都好信得過細仔。
Alex話，一年有成七個月喺美國，但做自己鍾意嘅嘢，就唔覺好辛苦。佢仲話公司訂單多咗，希望配合電商等業務，純利有望double，至於孟加拉廠房，就由佢媽媽顏太負責，實行雙劍合璧。