香港政壇大吹「和風」之際，已經退出公民黨嘅獨立議員毛孟靜「Miss Mo」就趁假期飛去日本，體驗真正和風，原來佢去到日本鎌倉，都不忘高舉黃傘，更加不忘老本行，極度關注各國嘅英語水平，插日本公共空間嘅告示版，英文水平「唔多掂」。
而一向被視為中間派嘅醫學界議員陳沛然，最近就陪老婆同3個囡囡去馬來西亞旅行，其間同家人服飾襯晒色，日前入水上樂園玩樂前，更罕有出post刊登「性感」相，相中嘅佢只着上泳褲加波衫，露出一雙肉腿，仲好風騷咁問網友，知唔知點解自己同家人要着同色衫旅行？有網民就估因為佢怕同家人走失喎！