人稱「體育王子」、前無綫電視新聞部體育組首席記者伍家謙，在2014年離開工作11年嘅無綫，當年由伍晃榮帶領加入新聞部，多年與伍晃榮亦師亦友，伍晃榮在2005年退休，2008年病逝，伍家謙當時未能趕到醫院送恩師最後一程。
伍家謙昨日於facebook悼念恩師，稱伍晃榮離開九年，當伍家謙整理舊照片時，憶起一段往事，約13、14年前發生，當時伍家謙畢業不久，初出茅廬，「工作大意粗疏；報道球賽，竟把勝負對調，A贏B寫成B贏A，屬極嚴重失誤。新聞播出街後，枱頭電話響過不停：朋友、行家、觀眾，接連來電指犯下大錯。自己邊急忙往剪片房改正，另一方面則嚇至雙腳發軟，暗忖：死喇呢次，衰鑊咁甘嘅。」
「犯錯當日，伍生休假；到翌日上班，我以等待行刑的心情待他回來發落。伍生一向嚴厲，平常犯些小錯都鏟到我上天花板，何況呢次咁大單？」
伍家謙話終於等到伍晃榮返嚟，已誠惶誠恐同伍晃榮解釋犯錯經過，「聽罷，他依舊是那副撲克臉孔，『嗯』了一句，就逕自走進『老細』(新聞部總監)的房間。這樣一來，我仲驚：即係點呢？死喇死喇死喇我……不一會，他走出房間了。劈頭第一句：『你介唔介意畀你爸爸個電話號碼我呀？』
伍家謙當時成個人震晒問咩事，伍晃榮就話想搵伍家謙爸爸傾吓「想同佢討論下你之後個去向啫，話晒你都做咗年幾咯，都係時候出去試下其他嘢啦係咪」，俾完電話號碼，伍家謙幾乎想喊出嚟，伍晃榮離開座位後，伍家謙就諗緊自己係唔係要凖備收拾細軟，隔咗半個鐘，伍家謙手機響，「看看來電顯示，是爸爸。『阿仔，你做錯嘢呀？』」，伍家謙答咗一句「……係」!
伍家謙爸爸讚伍晃榮呢個阿頭真係好好，「佢打畀我，話知道你一定好驚，所以實會搵屋企人訴苦」、「佢話叫你唔使驚呀，仲叫埋我唔使擔心你。佢同我講：伍生(呢度係指我老豆)你放心呀！我請得佢返嚟，一定同你睇住佢㗎!稍後，又陸續有同事跟我說：『喂！o靚仔！阿盲(伍晃榮)頭先親自入老細房幫你解畫喎，你巴閉呀你！』」
佢解釋自己多年敬重伍晃榮，係因為對方雖然係一個非常惡嘅老細，但惡得有理，「這種，叫Tough Love；年少輕狂，總有不服氣的時候，但沒多久就摸熟他的脾性，懂得珍惜被他罵的時候。幾年之後跟他打邊爐喝啤酒，舊事重提，他哈哈大笑：『唔係咁你邊識驚呀!』」
「沒有伍生的教導，我一定不會是今天的我。這話看似老套，卻也千真萬確；伍生，謝謝，能受教於您，是我一生都引以自豪的事情。想跟您說一句，我過得很好；還有，我很掛念您。」伍家謙呢個回憶，王喜都有回覆：「羨慕您能遇到好老師!」亦有網民留言「伍晃榮，交俾你講體育！數不清聽了多少遍！懷念他」、「請將波係圓嘅精神傳承下去」、「能夠遇到一個好上司好難，能夠遇到一個亦師亦友的……更難！」
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw