特首梁振英告別特區政府之前，有場帶隊去大灣區考察嘅好戲要上演。眾所周知，中港融合甚至赤化香港係阿爺不能說的秘密（雖然已經用行動明目張膽咁展示……），貴為全國政協副主席，梁振英當然要做嘢推動交功課。
佢周三朝早會帶領卅幾人嘅特區高官團，喺尖沙嘴上船到大灣區幾個城市進行三日兩夜嘅考察，周五傍晚喺珠海搭船返港。出發前夕，黨報為佢造勢，《人民日報海外版》噚日刊登題為〈想上粵港澳大灣區的車？要快〉嘅文章，hard sell「想上車，要快！」。
點解搭船出發又關上車事？查實黨報係想講，香港可以喺大灣區中扮演中國同世界嘅「超級聯繫人」角色，但擔心香港逢融合必反，反而錯失良機。
文中仲話梁振英呼籲把握機遇係「肺腑之言」，強調「機不可失，時不再來，想上車，要快！」。