今年56歲嘅立法會教育界議員葉建源，鞭策教育局局長吳克儉時鞭鞭有力，皆因佢確實熟悉教育界運作，咪睇佢平時喺立法會發言唔算多引經據典，查實佢係文史哲專家，早喺1978年即係中五嗰年，喺港台搞嘅第一屆校際國學常識問答比賽，就代表學校、觀塘著名男校聖言中學奪總冠軍，當時佢以隊長身份喺時任廣播處長高德樂手上領取冠軍獎盃。
「成功感多過做議員」
葉建源初中時已經係四眼仔一名，書生味甚濃。而佢嘅考試成績都優良，會考中文攞A，中史攞B，直升聖言預科，再升讀港大。咪以為讀書叻就係書呆子，葉建源讀預科時為咗支持母語教學，加入當年中文運動嘅中學生組，仲自發到《城市論壇》發言，果然關心教育政策。
大學畢業後去咗中學教書，1986年教到1995年，呢段原來係佢人生中最回味嘅日子，憶述做中四級班主任，教中文同中史，同班學生幾乎日日見，建立深厚師生感情，將來有天卸下所有職務時都想重返校園教書：「做老師嘅成功感，多過做議員。」
佢之後到教育學院做師訓、教學研究工作。教院位於大埔，窗外就係八仙嶺，葉建源喺1998年，即係兩位教師於八仙嶺山火兩年後，都同師生去到紀念呢兩位教師嘅春風亭，憑弔一番，思考為人師表，所為何事。唔知係教院人傑地靈，定係佢護顏有術？睇番葉建源嘅舊相，發現佢咁多年來個樣冇乜點變過。
李八方