如果人有三衰六旺，華將梁家俊肯定屬於旺嗰個，而意大利騎師李寶利則係衰弱一位，事關今日（17日）第六場梁家俊爆冷贏馬起孖，李寶利則又屈居亞軍。
第六場三班草地1200米，舉行全日唯一錦標獅子會盃，梁家俊騎容天鵬馬房「手到拿來」把握今日田草C加3跑道利放頭的形勢，貼住內欄一放到底贏半馬位，梁家俊個人連同第三場後上贏沈集成馬房「華麗再現」，宣告起孖兼捧盃。目前梁家俊有22Win，在「告東尼獎」領先嘉琦BB三場頭馬，形勢頗佳。
「手到拿來」次次靠放次次叫糊，呢場終於食得出，爆12倍冷Win打破近兩季頭馬荒，組合獨贏A2派16元。
有人快樂有人愁，李寶利呢位準老竇騎師繼第二、三場分別騎「銘記心中」（亞軍）及「醉必勝」（季軍）出擊跑位置贏唔到後，今場他騎落飛次熱「英明勇將」又因末段搵位延誤，導致姍姍來遲再做二奶，個人全日跑完上半場仲未贏到馬僅得三P。
第六場三、四名由落飛半冷「金剛之星」及大冷「中華寶貝」順序瓜分，四重彩派超過10萬元，三T正獎有人中，每注派98萬幾。