【本報訊】在銅鑼灣經營23年的法式牛扒屋W's Entrecôte難敵加租，昨最後一日營業，正式告別老饕。從餐廳開張守到結業的行政總廚楊桂林回顧煮法餐生涯，力求23年來出品始終如一，「一定用高質素嘅牛扒，唔會呃人」。過去3個月他無放過一日假，訂枱接連爆滿，有擁躉一周捧場3次，以品嚐最愛的炭燒牛扒。
記者：廖梓霖
昨餐廳只剩下少量位置供即場光臨的顧客用膳。負責人郭小姐指，牛扒屋不會有特別的結幕儀式，稍後才考慮是否復業。餐廳行政總廚楊桂林透露，3個月前通知食客餐廳結業後，預訂即時爆滿。
有40多年入廚經驗的楊笑指在牛扒屋工作是人生打得最開心的一份工，入職後老闆曾兩次送他到法國進修廚藝。他自豪道，餐廳出品23年如一日，「我哋一定會用有質素嘅牛扒，顧客幾時嚟食到嘅味道都一樣」。
「唔係做得唔好 係租太貴」
說起鎮店名菜炭燒牛扒，楊更頭頭是道，指炭燒比普通煎牛扒更健康，因烹飪過程中會把肉類多餘脂肪逼出，「曾經有趕飛機嘅客人叫我縮短燒扒時間，等佢食到，我話無可能，因為要確保質素，客人最後都係食唔到。」光臨的客人大多為熟客，甚有人情味，「有外國客食完扒，特登叫我出去，佢特登幫我點咗杯嘢飲，讚個扒好食。」
多年來在餐廳留下不少難忘回憶，楊桂林數月前知悉結業，不免欷歔，「唔係我哋做得唔好，係租太貴，可能銅鑼灣多餐廳選擇，大家會周圍食嘢」。楊年屆64歲，結業後希望休息一段長時間，但若老闆東山再起，他必定復出。
劉先生一家四口特地預約品嚐炭燒牛扒，一家人幫襯了23年，連生日也多數在扒房度過；臨近結業更一周吃了3次，「無辦法，真係好唔捨得」。食客譚生指，餐廳搬到現址前，他有份建造餐廳所在的酒店大廈，昔日完工便是在扒房吃飯慶祝，甚有感情。在美國定居、回港的何小姐在酒店晉午膳，才知餐廳結業，她指在美國很少餐廳因瘋狂加租結業，「每次返嚟香港都唔明啲舖頭點做落去，賺埋唔夠出糧，如果我有錢，拎去玩都唔會喺香港開舖」。何小姐亦讚餐廳食物質素高，令人難忘。
【食客心聲】
劉生（右上）
「今個星期已經食咗3次喇，梗係唔捨得，我個仔最鍾意飲蘑菇湯。」
譚生（右二）
「呢度啲扒個質感同出面唔同，結業係好可惜。」
