空難後137日，已經企番起身嘅查比高恩斯，喺上周六贏得球隊重建後首個冠軍！佢哋喺聖卡塔蓮娜省聯賽以2:0擊敗祖恩維爾，提早一輪贏得次階段省聯賽錦標，嚟緊仲會爭省聯賽總冠軍。
重建137日摘省聯冠軍
巴西球會查比嘅故事由悲傷變成勵志，空難後唔夠半年，佢哋就贏得冠軍。喺聖卡塔蓮娜省聯賽次階段，佢哋表現優異，雖然喺第一場聯賽和波，但之後七場贏晒，包括上周六2:0贏咗祖恩維爾，提早一輪鎖定冠軍。佢哋呢場入波嘅都係空難後加盟嘅救兵、聖保羅借將列拿度靠12碼開紀錄，半場領先1:0。之後輪到今年回巢嘅前鋒迪美路喺84分鐘鎖定贏2:0。佢哋八戰得22分，領先第二位嘅祖恩維爾六分，喺聯賽得番一場之下提早封王。
查比喺空難後137日就贏得錦標，真係相當難得，因為佢哋重建時間唔夠半年，隊波入面有19個係借將，絕大部份都喺空難後先加盟，所以大家夾咗唔係好耐。查比喺五月就會以次階段冠軍嘅身份，同首階段盟主艾華爾踢兩回合嘅決賽，爭奪今屆聖卡塔蓮娜省聯賽總冠軍。查比今季好忙，除咗省聯賽外，有好多盃要爭，近排要分心踢自由盃分組賽，仲有南超盃次回合，到五月就輪到巴甲開鑼。
空難中僅三名球員生還
查比舊年11月喺踢南球盃決賽首回合對國民體育會前遇上空難，全機有71人遇難，只得六個人生還；22個隨隊嘅球員入面，只係得三個生還，包括後衞阿倫路舒曹、希里奧尼圖同門將科文，其中科文因空難而需要接受腿部截肢手術，肯定唔可以再踢番職業波。