亞視前小花鄭伊娜兩年前因貪靚中伏，到美容院做laser（激光）療程時發生失誤險毀容，令她陷抑鬱恐懼患情緒病，過去一年半好似殭屍般生活！日前鄭伊娜在大角嘴接受《蘋果》專訪，眼濕濕說：「皮膚傷咗，塊面有紅印同疤痕，我覺得同毀容冇分別，自己靠樣搵食，除咗工作之外，影響埋正常生活，醫生話唔可以見陽光，連廚房有光透入屋，我都即刻彈開。」
「食咗過千粒藥」
當時徬徨的鄭伊娜四處尋醫：「人生裏面冇睇過咁多醫生，亦未食過咁多藥，我諗年幾以嚟食咗過千粒，食同搽嘅藥膏都好勁，每日只有四小時係有精神，所有人都唔想見，情緒病、抑鬱症、人群恐懼症，試過喺街上見到人好熱鬧，我就喊！」剛巧那時她跟亞視約滿，同一日就遇上美容事故，在新公司傾好的節目和廣告全部損失幾百萬元，慶幸無被反告賠償。
鄭伊娜慨嘆：「之後一路冇收入，要靠父母接濟，不斷支出睇醫生，唔好諗身邊啲人會諒解你，有啲人會落井下石，畀說話你聽，有次戴口罩出席慈善活動，台下有人好大聲嗌：『喂，戴口罩嗰個除咗去啦，你知唔知你好肉酸，影響晒成個構圖。』落台我即刻爆喊。成年幾以嚟，我見過朋友一隻手數晒。當時覺得自己好醜，一照鏡會好竧，不斷問自己點解，食咁多藥同搽咁多嘢都唔好，到底邊個真正幫到我？」
靠化妝遮掩傷痕
幸好經家人和好友鼓勵，鄭伊娜終於走出低谷，惟疤痕仍留在臉上，要靠化妝遮掩，而且之前食得太多類固醇和抗生素，導致子宮發炎、生理錯亂。早前為了重新拼搏，她去歐洲玩足一個月，現正式重投工作：「主力喺內地發展拍電視劇做節目，要追番之前年半條數，雖然爸爸媽媽冇追我數，但我都要畀番佢哋。」
採訪：卓寶花
攝影：沈健程
場地：月島日本菜（大角嘴）
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw