一連四日嘅復活節長假，噚日完咗咯，唔知大家有冇外遊？八方只知政界中人個個雞飛狗走，短短哋都離港幾日散心唞一唞！
公民黨核心余若薇亦趁住復活假期，一家大細去咗新加坡聖淘沙，余大小姐亦唔吝嗇喺facebook開心share，相中可見佢同老公胡健維醫生甜甜蜜蜜放晒閃。但八方更感興趣嘅係，余大小姐嘅頭盔照。因乜解究要戴住頭盔去旅行？原來係要玩斜坡滑車（Skyline Luge），呢樣係聖淘沙必玩，難怪余大小姐都躍躍欲試。
而除咗斜坡滑車，樹頂極速滑行（MegaZip）都係當地推介嘅遊樂玩意，余大小姐亦趁復活節假嚟個大解放，膽粗粗玩埋一份刺激一番。