冰雪集團（Icicle）申請創業板上市，以為同迪士尼大熱動畫Frozen（《魔雪奇緣》）有關？錯嘞，公司係香港老牌印刷商冰雪製作，由太子女胡陳德姿（Bonnie）接手，家陣變身為一家廣告公司。
話說冰雪製作係陳永柏兩夫妻嘅心血結晶，愛女Bonnie從牛津學成歸來之後，做咗幾年大摩就返屋企幫手，眼見印刷業越來越做唔住，毅然帶家族公司轉型，打入電子書市場。
目前幫客仔度橋、製作marketing一條龍，35%收入來自金融同保險公司，另外30%來自零售業，奢侈品牌客仔都佔17%，咪話唔犀利。
冰雪除咗原大股東陳家之外，仲有位長期策略投資者周世耀（Evan），來頭唔細，做過花旗、雷曼等大行，本身又係教育工作者聯會副會長、百仁基金會理事，同城中公子哥兒應該有幾句偈傾。獨董之中，就有浩德控股（8149）老闆葉天賜。