復活節假期前有一個通告，應該吸引唔少專業股民注意，就係米蘭站（1150）主席姚君達同胞弟姚君偉一齊辭職，姚君達退休，姚君偉就要專注業務運營而辭任執董（因專注而離開?!），市場立刻憧憬是咪賣殼最終回。
兩位姚生辭職後，米蘭站剩下兩位執董，分別係胡博與曹慧娟。曹慧娟33歲，上月獲委任為執董，畢業於湖北工業大學，現為深圳中際影視運營總監。39歲嘅胡博就於舊年6月獲委任為執董（姚君達4月批舊股之後），胡博2002年畢業於東北財經大學，為深圳華億信息科技銷售總監。
翻閱米蘭站舊年所有通告，姚君達舊年4月大手批出舊股後，有多項人事變動，兩名非執董先後辭職，公司秘書9月換人，核數師12月換埋，本月初蔡偉國亦辭任執董，通告指佢「仍擔任行政總裁並繼續為本公司營運提供支持」。米蘭站上月又買入一間財仔。
好明顯，米蘭站入面，唔少人和事已經面目全非。姚君達舊年以1.04元批舊股，9月再以0.329元批新股，現時持股逾一成，仲係主要股東，其餘都算係街貨，專業股民都喺度剝花生，想知呢隻股有乜玩法。