港鐵今年2月話過沙中綫進度完成47%，佢哋噚日特別喺官方facebook上載一張鑽石山站興建中嘅沙中綫月台相片，畀大家睇吓進度，相中可見各條柱嘅圖案同𠵱家嘅鑽石山站有啲唔同，就係鑽石圖案更精細，佢哋仲形容：「大粒咗好多，同閃好多㖭！」
有網民話太浮誇
港鐵fb以「鑽石山站真係有鑽石？！」出po，話要帶大家去鑽石山站沙中綫新大堂同月台「尋寶」，「喺大堂同月台嘅柱位都有新一代嘅『鑽石』㗎」。相對現時鑽石山站月台以黑色為主色，當中部份正方形「紙皮石」為白色，代表「鑽石」，新設計嘅「鑽石」似乎更形象化同具體化。
網民則意見紛紜，有網民指新不如舊，「講真，新站啲『鑽石』太浮誇。好似舊站咁平平實實就可以了」，亦有網民話：「幾得喎！劃一用紙皮石得嚟，鑽石又有新pattern。」