唔好以為淨係得「戰鬥民族」俄羅斯先有足球暴民，喺周日巴斯蒂亞迎戰里昂嘅法甲比賽，亦因為主隊球迷賽前同半場時兩度襲擊里昂球員，令到比賽腰斬。法國足總其後發表聲明，譴責喺熱身嘅時候同埋半場發生嘅暴力事件。
巴斯蒂亞球迷早有前科
據報，賽前里昂球員熱身時，已經有巴斯蒂亞球迷闖入球場襲擊部份里昂球員，就連前曼聯翼鋒迪比亦都受到挑釁，令到客軍球員返入更衣室避難，仲一度拒絕落場比賽，結果延遲咗50幾分鐘先開始。點知踢完半場後，巴斯蒂亞球迷又再衝入球場搞事，里昂門將安東尼盧比斯更加同佢哋發生肢體衝突，而半場再次發生暴力事件亦令到比賽終於要腰斬。
榜尾嘅巴斯蒂亞喺二月已因球迷種族侮辱尼斯巴洛迪利同埋襲擊尼斯隊巴而被扣分，相信佢哋今次都好有機會再被扣分，甚似乎係更加嚴厲嘅處分。