唔知係練馬師大摩旺，還是老將本港13屆冠軍騎師韋達翻生，總知今日（17日）沙田最高班第八場二班草地1200米，由佢哋合作之「駿皇綵」直路揀於內欄窄位衝上竟無擠阻，順利大熱勝出，此駒累積在港四戰贏晒，今場單Win及組合獨贏A1分別派28.5及21.5元。
三歲澳洲自購馬「駿皇綵」現評99分，是全港最高分三歲馬，由2月11日開始，在港出賽短短兩個多月四戰全勝，當中無論跑田草1000米直路抑或1200米轉彎途程，此駒均未逢敵手，具備本港短途新王者風範。
「駿皇綵」慣性放頭制勝，呢場卻留前鬥後，直路一度於內欄疑似冇位出要等，幸而最終城門打開，韋達見機不可失，馬上全力催策，從內欄長驅直進，頂住外側冚上的上屆主席短途獎得季軍「龍城勇將」，最終小勝「龍城勇將」半馬位，完成四連霸。
值得一提，大摩這天勝出「駿皇綵」後，馬房累積連續九年復活節賽日報捷，戰績十分突出。
今場二至四名順序「龍城勇將」、「活力小駒」及「飛龍駒」，四重彩派三萬五千幾。