趁拜仁慕尼黑失分，多蒙特同RB萊比錫都喺上周六德甲贏波，前者有馬高列奧斯復出入波，主場以3:1擊敗法蘭克福；萊比錫就仲勁，喺地頭4:0炒弗賴堡後，確定順利攞到下季歐聯參賽資格。
今季經常受傷患困擾嘅馬高列奧斯，唞完六周後正選復出，開賽兩分鐘就用後腳入波，加埋柏柏斯達夫普路斯同奧巴美揚其後各入一球，主場3:1輕取法蘭克福，喺歐聯八強次回合造訪摩納哥嘅生死戰前，重振番士氣。不過，列奧斯呢場踢完上半場就退下火線，但教練杜曹就派定心丸話愛將冇傷，只係以防萬一，所以周三對摩納哥一戰，應該可以候命。至於喺早前炸彈恐襲中被玻璃碎片整傷嘅馬斯巴查，留院四日做完手術後，上周六終於出院。佢話好多謝喺呢段期間，不斷收到球迷同隊友嘅鼓勵，又承認喺意外發生後嗰15分鐘，係佢人生最難捱嘅時刻。
萊比錫鎖定歐洲賽資格
同日，次席嘅萊比錫就4:0大勝弗賴堡，最開心唔係因為拜仁另一邊廂作客悶和利華古遜，拉近咗同佢哋八分差距，而係喺淨番五場波嘅情況下，已經鎖定前四位置，下季肯定有得踢歐聯，成就創會七年以來嘅創舉。