美國聯合航空逐客事件，轟動全球，睇YouTube學英文，UA行政總裁Munoz嘅第一份「致歉」聲明，用咗re-accommodate一字，成為最新鮮滾熱辣、紅透半邊天嘅英文新字。Accommodate本來就解作安置，如政府收地，將地上居民安置到其他居所，就可以叫re-accommodate，呢次聯航監粗將一位越南華裔美籍醫生杜成德（David Dao）拉、抬、扯出機艙，聯航話係re-accommodate a passenger，美國網民為之嘩然，有人直情話想兜口兜面打Munoz一拳，並名為re-accommodate your face。華爾街日報話從今以後，呢個英文字可以進入Euphemism Hall of Fame！香港啲高官以後恐怕要小心用字嘞，去收地拆屋、強行抬走居民之時，千祈唔好講re-accommodate the residents。
聯航除咗對英文有貢獻之外，還有可讚之處，就係為全世界飛機乘客清清楚楚闡釋咗何為bump客，等大家好了解呢個概念。全世界航空公司都有超額沽售機票或超額訂位（overbook）呢回事，各國政府法律都容許呢種銷售行為，原因係航空公司要將載客比率最大化，盡力避免機艙有空位，以免浪費燃油（即提高收益），一百個座位或會出售一百一十張機票以上，以防乘客臨時取消飛行。美國交通部嘅數字係2016年全美有6億6千萬航機乘客，其中有4萬1千個非自願、被逼離開嘅乘客，比例係每一萬個乘客之中，有0.62個，聯航嘅比例係0.43個，係一個極低數字，當然還有一啲「自願接受賠償」而延後一班機嘅乘客。比例既然低，應該絕大部份時間相安無事吖，點解呢次咁大煲？最初話bump客係隨機抽樣，被選中的係唔好彩，但揭多一啲，航空公司電腦內有大量數據，一掃就知道機上（譬如有100人）乘客有邊位係熟客，邊位係稀客，邊位付足全票，邊位老早訂咗最便宜機票，邊位帶同幼兒同行，邊位係單身獨行，於是乎電腦就好容易咁樣「隨機」抽出一個單身無伴男人買咗最便宜機票，而且十年只幫襯一次嘅，仲唔係你！一定bump之哉啦，還要bump多三個呀，電腦又好易搵到對象啫。我地一買咗機票，就要接受晒所有航空公司嘅附帶條款，法律上難以爭辯，不過呢次聯航搞到粗爆出手抬人咁笨，引起世界公憤，啲美國律師聞風而至，代嗰位杜醫生打索償官司，聯航壞了聲譽之外，怕要賠錢賠到肉痛咯。