曾任林鄭月娥競選辦顧問嘅西貢區議員何民傑（圖），身為「奶粉」當然要積極護航，佢噚日出席《城市論壇》講到政府收緊辣招同房屋政策時，大讚林鄭嘅房屋政策，知道唔能夠將新建樓宇責任交晒畀房委會，就提出引入私人參與嘅首置上車盤，樓盤可以快至3至5年內推出市場，形容係根本嘅改變。
對於內地資金湧入被指拉高樓價，佢反駁話香港係國際經濟體系，「特朗普嚟香港起酒店我都阻唔到佢」，仲話國內資金來港起樓都未必賺錢，牽涉到樓宇質素口碑、銷售策略等，隨時蝕本喎。
同場嘅中原集團主席施永青回應林鄭嘅首置盤時就話，佢嘅房屋政策太多層，「想pleased（討好）好多人」，但資源根本唔夠，提議政府用首置盤代替居屋，限制發展商只可賣樓畀香港首置人士，入息上限建議唔超過3萬蚊等，而房委會集中興建公屋。